पोखरा, भदौ ९ । ठेकेदार कम्पनी चाइना सिएएमसी इन्जिनियरिङले पोखरा क्षेत्रीय अन्तराष्ट्रिय विमानस्थल निर्माण कार्य सुरु गर्न थालेको छ ।
कम्पनीले भदौ १६ गतेदेखि २०३२ सालमा अधिग्रहण गरिएको तीन हजार १०६ रोपनी र पछि थप गरिएको ६२९ रोपनीको पूरै जग्गामा तारबार लगाउन सुरु गर्ने विमानस्थल आयोजनाका सिनियर इन्जिनियर चन्द्रमणि सापकोटाले जानकारी दिनुभयो ।
कम्पनीले प्राविधिक कर्मचारी, कामदार र सामान राख्ने अस्थायी भवन बनाउन सुरु गर्न लागेको छ । आयोजनाको मूल गेटबाट विमानस्थलसम्म पुग्ने कच्चीबाटोलाई पक्की बनाउने काम सकिएको छ ।
गत वैशाख १ गते पूर्वप्रधानमन्त्री केपी शर्मा ओलीले विमानस्थलको शिलान्यास गरेलगत्तै वर्षायाम सुरु भएकाले निर्माणको काम अघि बढ्न सकेको थिएन ।
मुलुककै गौरवशाली आयोजनाकोरुपमा रहेको पोखरा अन्तर्रा्ष्ट्रिय विमानस्थलको निर्माण सन् २०२० जुलाईसम्ममा सक्ने लक्ष राखिएको छ ।
चीनको एक्जिम बैंकको करिब रु २१ अर्बको ऋण सहयोगमा विमानस्थल निर्माण हुन लागेको छ ।
