काठमाडौ १२ असार ।
बजारमा अत्यधिक मात्रामा रकम थुप्रिएपछि नेपाल राष्ट्र बैंकले आज १० अर्ब रुपैयाँ बराबरको राष्ट्र बैंक ऋणपत्र जारी गर्ने तयारी गरेको छ ।
तरलतालाई केही हदसम्म भए पनि नियन्त्रण गर्ने लक्ष्यका साथ ऋणपत्र मार्फत बजारबाट रकम उठाउन लागेको राष्ट्र बैंकले जनाएको छ ।
बैंकले एक सूचना मार्फत ऋणपत्र खरिदमा सहभागी हुन आग्रह गर्दै आज अपराह्न ३ बजेसम्म क, ख र ग वर्गका बैंक तथा वित्तीय संस्थाले उक्त ऋणपत्र खरिद गर्न सक्ने जनाएको छ ।
बोलकबोलमा सबैभन्दा कम ब्याजदरको प्रस्ताव गर्नेले ऋणपत्र खरिद गर्न पाउने व्यवस्था गरिएको बैंकले सार्वजनिक गरेको सूचनामा जनाइएको छ ।
बैंक तथा वित्तीय संस्थाबाट ऋण लिन धितोका रुपमा ऋणपत्र राख्न सकिने छ । पछिल्लो समय लगानीका अवसर निर्माण हुन नसक्दा बैंक तथा वित्तीय संस्थामा रकम थुप्रिएको छ ।
केन्द्रीय बैंकका अनुसार बैंकिङ क्षेत्रमा हाल एक खर्ब रुपैयाँ बढीको तरलता छ । तरलता व्यवस्थापन गर्न अनेकौँ उपाय अवलम्बन गर्दै आएको राष्ट्र बैंकले व्याजदर घटाएर भए पनि लगानी बढाउन अन्य बैंक तथा वित्तीय संस्थालाई आग्रह गर्दै आएको छ ।
