काठमाडौ १० जेठ ।
भारतको उडिसा राज्यस्थित सामुद्रीक बन्दरगाह पाराद्विपबाट झण्डै १० हजार मेट्रिक टन ग्यास नेपाल भित्र्याउने प्रक्रिया अन्तिम चरणमा पुगेको छ ।
नाकाबन्दी हटेको तीन महिनासम्म पनि काठमाडौंमा खाना पकाउने ग्यासको सहज आपूर्ति हुन नसकेपछि भारतीय आयल निगमकै प्रस्तावमा आपूर्ति मन्त्रालयले ग्यास पाराद्विप प्रशोधन केन्द्रबाट आयात गर्ने निधो गरेको हो ।
पाराद्विपबाट ग्यास नेपाल भित्रिएपछि काठमाडौं लगायतका सहरमा रहेको ग्यासको अभाव हट्ने आपूर्ति सचिव श्रीधर सापकोटाले बताउनु भयो ।
सचिव सापकोटाका अनुसार नयाँ प्रस्तावका बारे नेपाल आयल निगमको संचालक समितिले यसै साता भित्रमा अन्तिम निर्णय दिने जनाएका छन् ।
पाराद्विप प्रशोधन केन्द्रबाट ग्यास खरिद गरेर वीरगन्ज हुँदै नेपाल भित्र्याउने प्रकृयासम्बन्धी संवादको थालनी भारतका लागि निवर्तमान राजदुत दीपकुमार उपाध्यायले अगाडी बढाउनु भएको थियो ।
भारतको आन्तरिक मागमा देखिएको चापका कारण नयाँ प्रशोधन केन्द्र पाराद्विपबाट ग्यास दिन भारत सहमत भएको हो । हाल नेपालमा मासिक ३७ हजार मेट्रिक टन ग्यासको माग रहेको छ । गत अप्रिल महिनामा भारतबाट लगभग २७ हजार मेट्रिक टन ग्यास नेपाल भित्रिएको थियो ।
