काठमाडौ ,३० वैशाख ।
विनाशकारी भूकम्प गएको एक वर्षपछि सरकारले आज भूकम्पपछिको पुननिर्माणका लागि तयार पारेको पन्चवर्षिय योजना सार्वजनिक गर्ने तयारी गरेको छ ।
आज साँझ पाँच बजे एक कार्यक्रमकाबीच प्रधानमन्त्री केपी शर्मा ओलीले पुनःनिर्माणका लागि प्राधिकरणले तयार पारेको योजना सार्वजनिक गर्ने तयारी गर्नुभएको हो ।
राष्ट्रिय योजना आयोगले एक वर्षअगाडि तयार पारेको भूकम्पपछिको आवश्यकता पहिचानमा छुटेका कार्यक्रमलाई पञ्चवर्षीय योजनामा समेटिएको प्राधिकरणका प्रवक्ता ताराप्रसाद थपलियाले जानकारी दिनुभयो ।
सरकारले पञ्चवर्षीय योजना सार्वजनिक गरेसँगै दाताहरुलाई यसअघि प्रतिवद्धता जनाएको सहयोग दिन नैतिक दवाव पर्ने प्राधिकरणको बुझाई छ ।
पुनः निर्माणका लागी दातृ निकायबाट ४ खर्ब ४० अर्ब रुपैया सहयोगको प्रतिवद्धता आएपनि अहिलेसम्म १ खर्ब ५० अर्ब रुपैया मात्र सरकारलाई प्राप्त भएको छ ।
भूकम्प गएको एक वर्ष बितिसक्दा पनि पुनरनिर्माण सम्बन्धी योजना नल्याएको भन्दै विभिन्न क्षेत्रबाट प्राधिकरणको आलोचना हुदै आएको थियो ।
