काठमाण्डौ ,२५ चैत ।
आपूर्तिमन्त्री गणेशमान पुनले प्रमुख प्रशासनिक निकाय सिंहदरबार कालोबजारी गर्नेहरुको आश्रयस्थल बनेको बताउनु भएको छ ।
अखिल क्रान्तिकारी सिटिइभिटी कप २०७२ को ल्यावरोटरी मैदान कीर्तिपुरमा उदघाटन गर्दै मन्त्री पुनले ईन्धनमा कालोबजारी गर्नेहरु सिहंदरवारमा आश्रय लिएर बसेको बताउनु भयो ।
कालोबजारी गर्नेहरुलाई तह लगाउन आफूहरु क्रियाशील रहेको भन्दै उहाले सो काममा युवा विद्यार्थीहरुलाई सहयोग गर्न पनि आह्वान गर्नुभयो ।
ग्यास, पेट्रोल, डिजेल र मट्टीतेलको सहज आपूर्ति गर्न नसकेको भनेर सरकारको आलोचना भइरहेका बेला मन्त्री पुनले त्यसको जड सिंहदरबारमा छुपेको बताउनु भएके हो ।
उहाले आयल निगमको भण्डारण क्षमता बढाउने तयारी भइरहेको जानकारी पनि दिनुभयो । ‘अहिले आयल निगमको भण्डारण क्षमता १६ दिनको मात्र छ । अब चाँडै नै यसलाई हामी ९० दिनको बनाउँदैछौं ।’
तत्कालका लागि काभ्रेको पाँचखाल, धादिङको खैरेनीटार र नुवाकोटको बट्टारमा भण्डारण केन्द्र बनाइने तयारी भएपनि सरकारले सातवटै प्रदेशमा भण्डारण केन्द्र बनाइने योजना बनाइरहेको पनि जानकारी गराउनु भयो ।
कार्यक्रममा अखिल क्रान्तिकारीका बरिष्ठ उपाध्यक्ष नरेन्द्र न्यौपानेले आफूहरु स्ववियु निर्वाचनमा जान आतुर भएको भन्दै तत्काल मिति घोषणा गर्न त्रिभुवन विश्वविद्यालयलाई आग्रह गर्नुभयो ।
कार्यक्रममा राष्ट्रिय खेलकुद परिषदका पूर्व सदस्य सचिव एवं अखिल नेपाल खेलकुद महासंघका अध्यक्ष युवराज लामाले नयाँ संविधान कार्यान्वयनका लागि खेलकुदमार्फत लाखौं युवाहरुलाई गोलबन्द गर्नुपर्नेमा जोड दिनुभयो ।
पाँच दिनसम्म चल्ने प्रतियोगितामा सिटिइभिटी अन्तर्गतका १० कलेज सहभागी रहेका अखिल क्रान्तिकारीका प्रवक्ता सुरेन्द्र बस्नेतले जानकारी दिनुभयो ।
