काठमाडौं, चैत्र १७
ग्याँस बिक्रेता महासंघले ग्याँस उद्योगहरूले कृत्रिम डिलरहरू खडा गरेर कालोबजारी गरेका कारण बजारमा ग्याँसको अभाव भएको दाबी गरेको छ । बिक्रेताहरूले उद्योगको बदमासीमा आधारित भएर आफूहरूलाई धरपकड नगर्न सरकारसँग माग गरेका छन् ।
महासंघले आज गृहमन्त्री शक्ति बस्नेतलाई ज्ञापन पत्र बुझाएर उद्योगहरूको बद्मासीका कारण उपभोक्ताहरूले अभाव झेल्नु परिरहेको भन्दै हचुवाका आधारमा ग्याँस बिक्रेताका गोदाममा छापा मारेर बिक्रेताहरूलाई आतंकित नतुल्याउन माग गरेको हो ।
प्रहरीले कतिपय बिक्रेताहरूलाई कालोबजारी गर्दै गरेको अवस्थामा पक्राउ गरेर कारबाहीको प्रक्रिया अगाडि बढाएपछि महासंघको टोली आज गृहमन्त्रीलाई भेट्न पुगेको हो ।
महासंघले केही बिक्रेता कालोबजारीमा संलग्न रहे पनि अधिकांश बिक्रेताहरूले उद्योगहरूले उपलब्ध गराएका ग्याँस सहज रूपमा वितरण गरिरहेको दाबी गर्दै प्रहरीले छापा मार्ने र झूठा मुद्दा लगाउने क्रम नरोकिए देशभरका डिलर बन्द गर्ने चेतावनीसमेत दिएको छ ।
जवाफमा गृहमन्त्री शक्ति बस्नेतले निर्दोष बिक्रेतामाथि कुनै किसिमको कारबाही नहुनेमा निर्धक्क हुन बिक्रेताहरूलाई आग्रह गरेका छन् । देशभर हाल करिब १५ हजार ग्याँस डिलर रहेको छ ।
