भक्तपुर, ३ माघ ।
भत्तपुरको मध्यपुरथिमि नगरपालिका– १ लायकुमा खाना पकाउने ग्यास चुहिएर एक जनाको मृत्यु भएको छ ।
गए राति आगलागी हुदा ८८ वर्षीय कान्छा सिपाईको मृत्यु भएको महानगरीय प्रहरी वृत्त थिमिका प्रहरी नायब उपरीक्षक प्रवीणलाल श्रेष्ठले जानकारी दिनुभयो ।
घरको तेस्रो तलामा बनाइएको कच्ची टहरामा रहेको भान्छा कोठामा ग्यास चुहिरहेको अवस्थामा सिपाईले ग्यास बालेलगत्तै आगलागी भएको प्रारम्भिक अनुसन्धानबाट खुलेको प्रहरीको भनाइ छ ।
यसैबीच, महोत्तरीको जलेश्वरमा २३ दिनअघि ग्यास चुहिएर पूरै जिउ जलेकी एक महिलाको आज बिहान उपचारका क्रममा मृत्यु भएको छ ।
मृत्यु हुनेमा जलेश्वर नगरपालिका– २ बस्ने ३५ वर्षीया दिव्यादेवी पूर्वे रहेको परिवारजनले जनाएका छन् ।
गतपुस १० गते साँझ घरमा खाजा पकाइरहेको क्रममा ग्यास चुहिएर शरीरको ७० प्रतिशतभन्दा बढी भाग जलेर गम्भीर घाइते भएकी पूर्वेको उपचार भारतको पटनास्थित अस्पतालमा भइरहेकामा आज बिहान ५ बजे मृत्यु भएको निजका पति सञ्जय साहले बताउनुभयो ।
सो आगलागीमा परी ४० वर्षीय सञ्जय साह र जलेश्वर १४ बस्ने १६ वर्षीय कामदार कुन्दन चौधरी पनि घाइते भएका थिए । उनीहरुलार्य भने उपचारपछि निको भएको छ ।
