काठमाडौं, १ माघ ।
आज माघे संक्रान्ति, सूर्य धनु राशिबाट मकर राशिमा प्रवेश गरी उत्तरायण सुरु हुने भएकाले माघ १ गतेलाई मकर सङ्क्रान्ति पनि भन्ने गरिन्छ । जोतिसशास्त्र अनुसार आजदेखि उत्तरायण सुरु हुने भएकाले दिनभन्दा रात छोटा हुँदै जाने बताइन्छ ।
आज देवघाट, त्रिशूली, कालीगण्डकी, बाग्मती, इन्द्रावती, त्रिवेणी, रिडीलगायतका ठाउँमा माघ स्नान गर्ने भक्तजनको घुईंचो लागेको छ । माघे सङ्क्रान्तिका दिन घ्यू, चाकु, तिलका परिकार, तरुल, पालुङ्गो, खिचडी आदि खाने चलन छ । यी परिकारले जाडोमा न्यानो दिने भएकाले चिसो समयमा पर्ने पर्वमा ताता परिकार खाने गरिएको हो ।
यसैबीच थारु समुदायले आज नयाँ वर्षका रुपमा धुमधामका साथ स्नान, दान, एवम् खानपिन र रमाइलो गरेर माघी पर्व मनाउँदैछन् ।
सूर्य उत्तरायण प्रवेश गर्ने दिन माघ १ गते थारु समुदायको नयाँ वर्ष माघी पर्व पर्दछ । माघ १ गतदेखि पाँच दिनसम्म धुमधामका साथ तराई क्षेत्रमा यो पर्व मनाइन्छ ।
पुसको अन्तिम दिन हिजो रातभर जाग्राम बसेर रमाइलो गरी माघीका दिन बिहानै नयाँ वर्षलाई स्वागत गर्ने चलन छ । माघ १ गते बिहानै जलाशयमा गई स्नान, पूजा गरी ठूला बडाकहाँ गएर आशीर्वाद लिने परम्परा थारु समुदायको छ ।
यसै अवसरमा राजधानीमा बसोवास गर्ने थारु समुदायले यसपाली दुई स्थानमा बेग्लाबेग्लै माघी महोत्सव मनाउदै छन ।
यसअघि एकै स्थान टुँडिखेलमा आयोजना हुँदै आएको महोत्सव खुलामञ्च र दशरथ रंगशालामा हुने भएको छ । थारु विद्यार्थी समाज लगायत अन्य संघ संस्थाको पहलमा महोत्सव खुला मञ्चमा हुन लागेको कार्यक्रममा प्रमुख अतिथिका रुपमा पुर्व प्रधानमन्त्री बाबुराम भट्टराईलाई निम्त्याइएको छ ।
त्यस्तै रंगशालामा हुन लागेको महोत्सवमा प्रमुख अतिथिका रुपमा प्रधानमन्त्री केपी शर्मा ओली तय भएको थारु कल्याणकारीणी सभा उपत्यका समितिका अध्यक्ष सत्यनारायण चौधरीले जानकारी दिनुभयो ।
