काठमाडौँ, २५ पुस ।
नेपाली काँग्रेसका केन्द्रीय सदस्य विमलेन्द्र निधिले सहकारीको सही सदुपयोग हुन नसकेको बताउनुभएको छ ।
उपलब्धि बहुउद्देश्यीय सहकारी संस्थाको सातौँ वार्षिक साधारणसभाको उद्घाटन गर्दै उहाँले सहकारीमर्फत प्रगति हासिल गर्न सकिने भएतापनि सहकारीको सही प्रयोग हुन नसकेकाले समस्या आएको बताउनुभयो ।
ग्रामीण अर्थव्यवस्था विकासका लागि सहकारी नै उत्तम विकल्प भएको उहाँको भनाइ थियो ।
अहिले नाकाबन्दीका कारण जनताले सास्ती पाएको बताउँदै उहाँले केही समयभित्रै नाकाबन्दी हट्ने विश्वास व्यक्त गर्नुभयो ।
पूर्व अर्थमन्त्री शङ्करप्रसाद कोइरालाले सहकारीमार्फत देश आत्मनिर्भरतामा जान सक्ने बताउनुभयो । परनिर्भरता हटाउन सहकारी प्रमुख माध्यम बन्न सक्ने उहाँको भनाइ थियो ।
तीन खम्बे अर्थतन्त्रबाट नै देश आत्मनिर्भर बन्न सक्ने बताउँदै उहाँले सहकारीले अन्य क्षेत्रमा रचनात्मक काम गरेपनि कृषि क्षेत्रमा विशेष लगानी गर्न आवश्यक भएको बताउनुभयो ।
राजनीतिक विश्लेषक पुरुषोत्तम दाहालले पूँजीवाद र समाजवादकोे सम्मिश्रण नै सहकारी भएकाले सबैका लागि सहकारी उत्तम माध्यम भएको बताउनुभयो ।
कार्यक्रममा साहित्यकार धु्रवप्रसाद सापकोटा, रत्न शमशेर, धु्रवचन्द गौतमलगायतले मन्तव्य व्यक्त गर्नुभएको थियो ।
हाल संस्थाको सेयर पूँजी रु दुई करोड ५९ लाख ७६ हजार ३०० रहेको सो अवसरमा जानकारी दिइयो । संस्थाले रु १३ करोड ६३ लाखभन्दा बढी निक्षेप सङ्कलन गरेको जनाएको छ ।
