पुष २३, काठमाडौं । आन्दोलनरत मधेसी मोर्चाको ११ बुँदे मागबारे टुंगो लगाउन बनाइएको संयुक्त कार्यदलको बैठकमा तीन दलले सीमांकन विवाद तीन महिनाभित्र टुंग्याउन छुट्टै राजनीतिक संयन्त्र बनाउने प्रस्ताव अघि सारेका छन् ।
सिंहदरबार दिउँसो बसेको बैठकमा तीनदलका तर्फबाट तीन महिनाभित्र सीमांकन विवाद टुंग्याउन यस्तो प्रस्ताव गरिएको हो । यद्यपी छुट्टै संयन्त्र बनाउँदा त्यसको क्षेत्राधिकार देखि कानुनी जटीलता हुने भन्दै कार्यदलबाटै टुंग्याउने माग मोर्चाले गरेको छ ।
कार्यदलका सदस्य एवं तमलोपा उपाध्यक्ष ह्दयेश त्रिपाठीले छुट्टै संयन्त्रलाई जिम्मा दिँदा त्यसको संवैधानिक, कार्यक्षेत्र र क्षेत्राधिकारको विवाद हुन्छ, वैधानिकतामा पनि प्रश्न उठ्ने भन्दै कार्यदलबाटै टुंग्याउनु पर्ने बताउनुभयो ।
तीन दलका तर्फबाट बैठकमा सहभागी सदस्यले भने यो प्रस्तावमा मोर्चा सकारात्मक भएको बताएका छन् । कार्यदलमा तीन दलका तर्फबाट महेश आचार्य, भीम रावल र कृष्णबहादुर महरा तथा मोर्चाका तर्फबाट ह्दयेश त्रिपाठी, राजेन्द्र श्रेष्ठ र रामनरेस राय सदस्य हुनुहुन्छ ।
