काठमाण्डौ,२३ पौष ।
सूचना तथा सञ्चारमन्त्री शेरधन राईले अप्ठ्यारो परिस्थितिबाट गुज्रिरहेको मुलुकको अवस्था केही दिनमै सहज हुने बताउनुभएको छ ।
प्रेस चौतारी नेपाल मोरङको आयोजनामा आज बिहान विराटनगरमा आयोजित पत्रकार सम्मेलनमा उहाँले वार्ता र संवादबाट सहमतिका लागि गठित कार्यदलले बुधबारदेखि नै मधेसी मोर्चासँग वार्ता सुरु गरेकाले केही दिनमै सबै समस्या समाधान हुने विश्वास व्यक्त गर्नुभयो ।
अघोषित नाकाबन्दीका कारण सिर्जित मानवीय सङकटलाई अन्त्य गर्न सरकारले अधिकतम लचकता अपनाएको चर्चा गर्दै उहाँले मोर्चाको ११ बुँदे मागलाई कसरी सम्बोधन गर्ने भन्ने विषयमा सरकार गम्भीर रहेको बताउनुभयो।
सरकारको प्रवक्तासमेत रहनुभएका उहाँले एक सातामा इन्धनको आपूर्ति सहज हुने र कालोबजारीलाई नियन्त्रण गर्न सरकारले प्रत्यक्ष रुपमा अनुगमनका साथै कारबाहीका प्रक्रिया अगाडि बढाएको स्पष्ट पार्नुभयो ।
