काठमाण्डौ,२२ पौष ।
दाङको घोराही–तुलसीपुर सडकखण्डमा स्कुल बस र माइक्रो बस एकआपसमा ठोक्किँदा भएको दुर्घटनामा मुत्यु हुनेको संख्या ७ पुगेको छ । २२ जना घाइते भएका छन । गम्भीर घाइते २ जनाको उपचारका क्रममा कोहलपुरस्थित मेडिकल कलेजमा मृत्यु भएपछि मृतकको संख्या ७ पुगेको हो।
तुलसीपुरबाट घोराहीतर्फ जाँदै गरेको रा १ ज ३७२ नम्बरको माइक्रो बस र घोराहीबाट विद्यार्थी लिन नारायणपुर तर्फ जाँदै गरेको रा १ क १९१ नम्बरको बस त्रिपुर नगरपालिका–३ को सौंरीकुलानजिक एकआपसमा ठोक्किँदा माइक्रो चालक सहित ५ जनाको घटनास्थलमै मुत्यु भएको थियो ।
माइक्रो चालक दाङ मानपुरका धनबहादुर थापा, यात्रु नारायणपुरका २६ वर्षिय सवनम अन्सारी र सल्यान काभ्राका डेढ वर्षका हेमन्त विष्टको मात्र सनाखत भएको छ । यस्तै उपचारका क्रममा तुलसीपुर राणगाउँकी किमीनी खड्का र ठेगाना नखुलेकी बिष्णु बिष्टको मुत्यु भएको छ । अन्य दुइ जनाको सनाखत हुन बाकी रहेको प्रहरीले जनाएको छ ।
घाइते मध्ये १० जनाको अवस्था गम्भीर रहेको दाङका प्रहरी प्रमुख एसपी कुवेर कडायतले जानकारी दिनुभयो । बिहान हुस्सु लागेका कारण सडक राम्ररी नदेखिँदा र माइक्रो बस तिव्र गतीमा रहेका कारण दुर्घटना भएको हुनसक्ने प्रहरीले जनाएको छ ।
