काठमाडौं, १९ पौष ।
सरकार आफ्ना माग सम्बोधन गर्न गम्भीर नभएको आरोप लगाउँदै आएको आन्दोलनरत मधेसी मोर्चाले रुपन्देहीमा विरोध सभाको आयोजना गरेको छ ।
आज दिउँसो १ बजे रुपन्देहीको बुटवलमा हुने विरोध सभालाई संघीय समाजवादी फोरम नेपालका अध्यक्ष उपेन्द्र यादव, सद्भावना सहअध्यक्ष लक्ष्मणलाल कर्ण लगायत नेताहरुले सम्बोधन गर्ने कार्यक्रम रहेको बताइएको छ ।
प्रदेश सिमाकंन लगायतका माग राख्दै आन्दोलन गर्दै आएको मोर्चाले सरकारलाई दबाब दिनकै लागि विरोध सभा आयोजना गरेको जनाएकोे छ ।
सरकार वार्ताको वातावरण बनाउनुको सट्टा शान्तिपूर्ण आन्दोलनलाई दबाउन लागि परेको आरोप लगाउँदै मोर्चाले सरकारले आफूहरुका माग सम्बोधनका लागि आधिकारीक अवधाराणा नल्याएसम्म वार्तामा नबस्ने वताउँदै आएको छ ।
यसैवीच मोर्चाको आन्दोलनमा समर्थन जनाउँदै नयाँ शक्ति अभियानका संयोजक डा.वावुरम भट्टराई पनि विरोध सभामा सहभागी हुने एक नेृताले बताए ।
बुटवलमा आयोजना गरिएको विरोध सभालाई भट्टराई, जनजाति नेता पद्मरत्न तुलाधर लगाएतकाले पनि सम्बोधन गर्ने कार्यक्रम रहेको मोर्चाको भनाई छ ।
