काठमाण्डौ,१८ पौष ।
उपप्रधानमन्त्री विजयकुमार गच्छदारले मधेसमा आन्दोलनरत दललाई मुलुकको गम्भीरतालाई ध्यानमा राखी वार्ता र छलफलबाट समस्या समाधान गर्न आग्रह गर्नुभएको छ ।
झापाको भद्रपुरस्थित मेची नदीमा निर्माणाधीन मेची पुलको स्थलगत निरीक्षण एवम् अवलोकनपछि पत्रकारसँगको भेटघाटमा उहाँले नेपाली जनतालाई दुःख, कष्ट र पीडामा धकेलेर आन्दोलन गरिरहनु नेपाली जनताप्रतिको जिम्मेवारी हुन नसक्ने बताउँदै समास्याको समाधान खोज्न आग्रह गर्नुभयो ।
उहाँले प्रदेश र सीमाङ्कनका विषयमा मधेसवादी दलले गरिरहेको आन्दोलनलाई लम्ब्याउनुभन्दा पनि वार्ता र छलफलबाट निकास खोज्नु उत्तम हो भन्दै भारतको अघोषित नाकाबन्दी छिट्टै हट्ने विश्वास दिलाउनुभयो ।
नाकाबन्दी र आन्दोलनका कारण देशमा अहिले छ खर्बको क्षति भएको उहाँले जानकारी दिनुभयो । उपप्रधानमन्त्री गच्छदारले निर्माणाधीन मेची पुल आगामी पाँच महिनाभित्र सम्पन्न गर्न निर्देशन पनि दिनुभएको छ ।
