काठमाडौ १५ पौष ।
गुरुङ समुदायको महान पर्व तमु ल्होसार आज धुमधामका साथ मनाउदै छन् । गुरुङ समुदायले प्रत्येक वर्ष पौष १५ गने नयाँ वर्षका रुपमा तमु ल्होसार मनाउने गरिन्छ । ‘ल्हो’ भन्नाले वर्ष तथा ‘सार’ भन्नाले ‘नया’ भन्ने बुझाउँछ ।
एउटा वर्षलाई बिदा गरी अर्को वर्षलाई स्वागत गर्दै हेसार मनाउने गरिन्छ । १२ ओटा वर्षलाई मुसा, गोरु, बाघ, खरायो, बिरालो, गरुड, सर्प, घोडा, भेडा, बाँदर, कुकुर , बँदेलको प्रतिकका रुपमा लिइन्छ । यस वर्ष भेडा वर्षलाई बिदा गरी बाँदर वर्षलाई स्वागत गरिदैछ ।
नेपालमा ल्होसार पर्व तामाङ, सेर्पा, गुरुङ, मगर, थकाली, जिरेल, भोटे, दुरा र लेप्चा लगायतका जातिले मनाउने गरिन्छ । ल्होसारका अवसरमा आफ्ना मान्यजनबाट आशीर्वाद लिने र शुभकामना आदानप्रदान गरिन्छ ।
साथै सेलरोटी, विभिन्न मौलिक परिकार बनाएर खाने तथा आफ्नै भेषभूषामा सजिएर एक ठाउँमा जम्मा भइ नाचगान गरि रमाइलो गर्ने परम्परा छ । ल्होसारको अवसरमा सरकारले आज सार्वजनिक बिदा दिएको छ ।
