काठमाण्डौ,१३ पौष ।
व्यवस्थापिका संसदमा मधेसी मोर्चाको अवरोधका वीच पनि संविधान संशोधन विधेयकमाथि सैद्धान्तिक छलफल शुरु भएको छ ।
बैठकमा सो विधेयकमाथि धारणा राख्दै नेकपा एमालेका केशव बडालले विधेयकमा समावेश भएका सबै कुरा संविधानमै समेटिएको भन्दै यसले खासै अर्थ नराखेको बताउनुभयो ।
यद्यपी सो विधेयक दलहरुको सहमतिमा आएकाले यसलाई पारित गर्न सबैले सहयोग गर्नुपर्ने उहाँको भनाई थियो । एकीकृत माओवादीका गौरीशंकर चौधरीले हाल देखिएको सिमांकनको विवादलाई पनि सम्बोधन गरेर एकीकृत विधेयक पेश गर्नुपर्ने बताउनुभयो ।
सिमांकन निर्धारण गर्दा जनसंख्या र भुगोल दुवैलाई प्राथमिकतामा राख्नुपर्ने भन्दै उहाँले कुनै एउटालाई मात्रै आधार बनाए समस्या उत्पन्न हुने उल्लेख गर्नुभयो । त्यसअघि बैठकले एसियाली पूर्वाधार लगानी बैंक स्थापना सम्बन्धि विधान सम्झौता अनुमोदन गरेको छ ।
त्यस्तै, पोखरा स्वास्थ्य विज्ञान प्रतिष्ठान विधेयक सर्वसम्मतीले पारित भएको छ । बैठकमा शिक्षा ऐन आठौं संसोधन विधेयकमाथि पनि छलफल भएको थियो । बैठक भोली दिउसो १ बजेसम्मका लागि स्थगित भएको संसद सचिबालयले जनाएको छ ।
