काठमाण्डौ,१२ पौष ।
नेपाली काँग्रेसका सहमहामन्त्री पूर्णबहादुर खड्काले मधेसी मोर्चाले उठाएका जायज माग तत्काल सम्बोधन गर्नुपर्ने बताउनु भएको छ । नेपाल प्रेस युनियन बागलुङको १४औैँ वार्षिक साधारणसभालाई आज सम्बोधन गर्दै उहाँले सीमाङ्कनलगायतका माग पूरा गर्नुपर्ने बताउनुभयो ।
सत्तापक्ष र प्रमुख प्रतिपक्षी नेपाली काग्रेसबिच भएको तीनबुँदे सहमतिले मोर्चाको माग सम्बोधन हुने वातावरण बनेको उहाँको भनाइ छ । उहाँले संविधान संशोधन, प्राधिकरण विधेयक र सीमाङ्कन विवाद टुङ्गाउने विषयमा प्रमुख दलहरुले गरेको सहमतिले गतिरोध हट्ने विश्वास व्यक्त गर्नुभयो ।
प्रमुख दलबीचको एकतामा जोड दिँदै उहाँले संविधान कार्यान्वयनमा दलीय एकता नभए मुलुक दुर्घटनातिर जाने चेतावनी दिनुभयो । पूर्व गृहमन्त्री समेत रहनुभएका खड्काले भारतसँगको कूटनीतिक असफलताका कारण नेपालको समस्या लम्बिँदै गएको र भारतले पनि नेपालसँग भद्दा कूटनीति गरेको आरोप लगाउनुभयो ।
