काठमाण्डौ,१२ पौष ।
एकीकृत नेकपा माओवादीका अध्यक्ष पुष्पकमल दाहालले नेपालको संविधान विश्वको उत्कृष्ट संविधानमध्ये एक रहेको दाबी गर्नुभएको छ ।
अखिल क्रान्तिकारी मोरङको १४औँ जिल्ला सम्मेलनको आज विराटनगरमा उद्घाटन गर्दै उहाँले मधेसी, थारुलगायत समुदायको जायज माग संविधानमा समावेश गर्न वार्ता जारी रहेको बताउनुभयो ।
संङ्घीय संविधान जारी भएपछि मुलुकमा सामन्तवादको अन्त्य भएको उल्लेख गर्दै अध्यक्ष दाहालले सामन्तवादका अवशेषलाई समाप्त पार्न अग्रसर भएर लाग्नुपर्नेमा जोड दिनुभयो ।
उहाँले मुलुक अप्ठ्यारो अवस्थामा रहेको समयमा हजारौँ सहिद, बेपता र सहिद परिवारलाई सम्झेर तेस्रो पार्टी भए पनि नेतृत्वदायी भूमिका खेलेर संविधान जारी गरिएको बताउनुभयो ।
पार्टीलाई दुई वर्षको अवधिमा एक नम्बरको पार्टी बनाउने उद्घोष गर्दै अध्यक्ष दाहालले यसका लागि विद्यार्थीको पनि सहयोग आवश्यक रहेको उल्लेख गर्नुभयो । पार्टी पुनःनिर्माणका लागि आउँदो १५ गतेदेखि अभियान सुरु गर्ने उहाको भनाई छ ।
