काठमाडौ ६ पौष ।
नेकपा एमालेका सचिव प्रदिप ज्ञवालीले शान्ति प्रक्रिया टुङ्गोमा पुगिसकेको र जारी संविधान सबैको साझा दस्तवेज भएकाले त्यसप्रति शंका नगर्न आग्रह गर्नुभएको छ ।
मिडिया इनटरनेशनल र माइका नेपालको सहकार्यमा आज आयोजित वर्तमान राजनितिक परिस्थिति र शान्ति प्रक्रिया विषयक अन्तरक्रियामा बोल्दै उहाँले मुलुकमा देखिएको समस्या चाडै समाधान हुने र त्यसका लागि सबै पक्ष एकजुट हुनुपर्ने बताउनु भयो ।
उहाँले ५ लाख जनताको सुझाव समेटिएको र संविधान सभामा रहेका ५९७ सभासद मध्ये ५३७ सभासदले पारित गरेको संविधान प्रजातान्त्रिक र समावेशी भएको दावी समेत गर्नुभएको छ । नयाँ संविधानले मधेशी जनताको सबै हक र अधिकार सुनिश्चित गरेको तर त्यो उनीहरुलाई बुझाउन जरुरी रहेको जिकिर गर्नुभयो ।
केही मधेश केन्द्रित दलको राजनितिक स्वार्थका कारण मधेश आन्दोलन चर्केको ज्ञवालीको भनाई छ । यस्तै कार्यक्रममा बोल्दै सभासद लालबाबु यादवले मधेशमा संविधानको प्रचार प्रसारका लागि मिडियाले भूमिका खेल्नुपर्ने बताउनु भयो ।
कांग्रेस युवा नेता रन्जित कर्णले नयाँ संविधानमा कमी कमजोरीहरु रहेकाले सच्याउनका लागि संशोधन प्रस्ताव दर्ता गर्नुपरेको बताउनुभयो । प्रदेश सिमांकनको विषयमा विज्ञहरुको सुझाव बिना शिर्ष नेताहरुको मात्र सहमतिमा टुङ्याएकाले अहिलेको मधेश समस्या उत्पन्न भएको उहाँको धारणा थियो ।
राजधानीको बानेश्वर स्थित इन्द्रेणी फुडल्याण्डमा आयोजित कार्यक्रममा राजनितिक विश्लेषक प्रा. डा. सुरेन्द्र केसीले वर्तमान राजनितिक अवस्था र शान्ति प्रक्रिया विषयक प्रतिवेदन प्रस्तुत गर्नुभएको थियो ।
