काठमाडौँ, ४ पौष ।
प्रमुख प्रतिपक्षी नेपाली काँग्रेस र तराई मधेशमा आन्दोलनरत संयुक्त लोकतान्त्रिक मधेसी मोर्चाबीच संविधान संशोधनको विषयमा छलफल भएको छ ।
काँग्रेस सभापति सुशील कोइरालाको निवासमा महाराजगञ्जमा बिहान भएको छलफलमा मुलुकको समसामयिक राजनीतिक संकट यथाशक्य छिटो टुङ्ग्याएर अगाडि बढ्ने सहमति भएको छ ।
छलफलमा काँग्रेसले व्यवस्थापिका–संसदमा पेस भएको संविधान संशोधन विधेयकलाई थप परिमार्जन गर्न सकिने विभिन्न पक्षहरुका बारेमा जानकारी गराउँदै त्यसमा मोर्चासँग आवद्ध दलहरुको सहमति लिएर आउन आग्रह गरेको थियो ।
मोर्चाले भने संसदमा पेस भएको संशोधन विधेयकले आन्दोलनका मागहरु सम्बोधन गर्न नसक्ने भएकाले प्रमुख मुद्दाका रुपमा रहेको प्रदेशको सीमासम्बन्धी विषयमा काँग्रेसको स्पष्ट जवाफ माग गरेको थियो ।
यद्यपि, काँग्रेसको उक्त प्रस्तावलाई मोर्चाले सकारात्मक लिँदै त्यसबारे आवश्यक छलफल गरेर आउने जवाफ दिएको छ । नेपाली काँग्रेसले वार्ता, संवाद र सहमतिबाटै अहिलेको समस्या हल गर्न सकिने भएकाले जिम्मेवारीपूर्वक भूमिका निर्वाह गर्न मोर्चालाई आग्रह गरेको थियो ।
छलफलमा काँग्रेसका तर्फबाट पार्टी सभापतिसहित अन्य पदाधिकारी र मोर्चाका तर्फबाट तमलोपा अध्यक्ष महन्थ ठाकुर, संघीय समाजवादी फोरम नेपालका अध्यक्ष उपेन्द्र यादव सहभागी हुनुभएको थियो ।
