काठमाडौँ, १ पुस ।
नेपाली काँग्रेसले संसदमा पेस भएको संविधान संशोधन सम्बन्धी विधेयकका आधारमा मुलुकको वर्तमान समस्याको समाधान खोज्नुपर्ने निष्कर्ष निकालेको छ ।
आज बसेको केन्द्रीय समिति बैठकले भूकम्पपछिको पुनःनिर्माण प्राधिकरण गठनसम्बन्धी विधेयक र संविधान संशोधन विधयक सदनमा पेश हुनुलाई सकारात्मक लिँदै समस्या समाधानका लागि अन्य दलसँग पनि परामर्श गरेर अघि बढ्ने निर्णय गरेको हो ।
बैठकपछि प्रवक्ता दीलेन्द्रप्रसाद बडूले पार्टीको संस्थागत निर्णयअनुरुप सदनमा दुबै विधेयक प्रस्तुत हुनु सकारात्मक ठहर गर्दै यसले अहिलेको समस्या समाधान गर्न सहयोग पुग्ने बताउनुभयो ।
त्यस्तै बैठकमा पार्टीको आशन्न १३ औँ महाधिवेशनको तयारी सम्बन्धमा छलफल भएको थियो । काग्रेसका नवीकरण गरेका पुराना र नयाँ थपिएका गरी क्रियासिल सदस्यको संख्या ४ लाख ७० हजार ६ सय ५५ पुगेको छ ।
यसअघि ३ लाख १६ हजार क्रियासिल सदस्य रहेकामा २ लाख ५६ हजारले मात्रै नवीकरण गरेका छन् भने यस वर्ष २ लाख २१ हजार १ सय ७९ नयाँ सदस्य थपिएका छन् ।
आजको बैठकमा सदस्यता छानविन समितिका संयोजक नरहरि आचार्यले आफ्नो प्रतिवेदन पेस गर्नुभएको छ । भोलि बिहान ११ बजे बस्ने बैठकमा सो प्रतिवेदनबारे छलफल हुने काग्रेसले जनाएको छ ।
