काठमाडौँ, १ पुस ।
उपप्रधान एवम् ऊर्जा मन्त्री टोपबहादुर रायमाझीले सामुदायिक ग्रामीण विद्युतीकरणमा लागेका संस्थाले प्रसारण र वितरणमा मात्रै ध्यान नदिई सहकारीको अवधारणामा विद्युत् उत्पादनमा लाग्नुपर्ने बताउनुभएको छ।
नेपाल विद्युत् प्राधिकरण, सामुदायिक विद्युत् उपभोक्ता राष्ट्रिय महासंघ र जर्मन सहयोग नियोगले आज ललितपुरमा आयोजना गरेको कार्यक्रममा उहाँले हालको प्रमुख आवश्यकता विद्युत् उत्पादन भएको बताउनु भयो ।
प्राकृतिक स्रोत तथा साधनले धनी भएर पनि मुलुक पछाडि पर्नुको खास कारण व्यक्तिवादी सोच रहेको उल्लेख गर्दै उहाँले ऊर्जा क्षेत्रमा देखिएको नीतिगत, प्रशासनिक समस्या समाधान गरेर अगाडि बढ्न सरकार तयार रहेको जानकारी दिनुभयो ।
भारतको नाकाबन्दीपछि मुलुकभर विद्युत्को माग एक हजार ८०० मेगावाट रहेको जानकारी दिँदै उहाँले जलविद्युत्, सौर्य ऊर्जा, वैकल्पिक ऊर्जाको माध्यमबाट विद्युत्भार कटौती कम गरिने स्पष्ट पार्नुभयो ।
