काठमाडौँ, २९ मङ्सिर ।
राष्ट्रिय निर्वाचन परीवेक्षण समिति (नियोक) ले भूकम्पपछिको राहत र पुनःनिर्माणको अनुगमन गर्ने भएको छ ।
नियोकले परीक्षणको पहिलो चरणमा भूकम्प अति प्रभावित गोरखा, दोलखा र सिन्धुपाल्चोकका पाँच पाँच गाविसमा अनुमगन गर्ने छ । यसका लागि नियोकले दुईदिने प्रशिक्षण कार्यक्रमको आयोजना गरेको छ ।
प्रशिक्षण कार्यक्रमको आज समापन गर्दै मानवअधिकारकर्मीद्वय चरण प्रसाईँ र भवानीप्रसाद खरेलले सरकार र विभिन्न सङ्घसंस्थाबाट प्रदान गरिएको राहत भूकम्पपीडित समक्ष पुगे नपुगेको, राहतको पारदर्शिता लगायत विषयमा ध्यान दिन प्रशिक्षार्थीलाई आग्रह गर्नुभयो ।
अनुगमन परियोजनाका निर्देशक विकल श्रेष्ठले प्रत्येक जिल्लाका पाँच गाविसका एक एक प्रतिनिधि र जिल्लास्तरीय प्रतिनिधि गरी १८ जनालाई प्रशिक्षण दिइएको बताउनुभयो ।
निर्वाचनसँग सम्बन्धित गतिविधिलाई हेर्दै आइरहेको नियोकले यस पटक मुलुकलाई नै परेको विपत्तिका क्रममा भएका गतिविधिलाई समेत अनुगमन गर्न लागेको छ । प्रशिक्षणमा पुनःनिर्माण प्राधिकरणका काम, कर्तव्य, कानुनी पक्ष, सम्बन्धित गाविसका सङ्घसंस्था, सरोकारवाला र पीडितसँग जानकारी कसरी लिने भन्ने कुरालाई जोड दिइएको थियो ।
