काठमाण्डौ,२७ मंसिर ।
भूकम्पका कारण काभ्रेपलाञ्चोकको दुर्गम क्षेत्र मानिने कोसिपारी र महाभारत श्रृङ्खला डाँडापारीका गाविसमा खाद्य संकट देखिएको छ ।
जिल्ला खाद्य सुरक्षा सञ्जालको अनुसन्धानबाट महाभारत श्रृङ्खला डाँडापारीका १२ वटा गाविस र कोसिपारीका २० गरी कुल ३२ गाविसमा खाद्य सङ्कटको जोखिम देखिएको हो । जिल्ला कृषि विकास कार्यालयका बाली संरक्षण अधिकृत देवराज अधिकारीका अनुसार ती गाविसमा ६० देखि ८० प्रतिशत खाद्य अप्रर्याप्तता भएको छ ।
भूकम्पपछि भएका राहत पुनःस्थापनालगायतका कार्यक्रमले जोखिम न्यूनिकरणमा सहयोग गरेको उल्लेख गर्दै अधिकारीले भूकम्पका कारणले थप समस्या आएको बताउनु भयो । नगरपालिका र केही गाविसभित्र कतिपय परिवारले खाद्यन्न नपाएका उहाको भनाइ छ ।
अत्याधिक समस्या भएको ठाउँमा दातृ निकायलाई नै गुहार्ने स्थिति आउन सक्ने अधिकारीले बताउनु भयो । जिल्लामा ठूलो समस्या नदेखिएकोमा जोड दिँदै उहाले सञ्जालभित्र जिल्लाका सबै कार्यालय प्रमुख रहेकाले प्राथमिकताका आधारमा विभिन्न कार्यक्रम सञ्चालन गरेर जोखिम हटाइने बताउनु भयो ।
