काठमाडौ, २७ मङ्सिर । प्रधानमन्त्री केपी शर्मा ओलीले भूकम्प र त्यस पछि अघोषित नाकाबन्दीका कारण देश बनाउने आफ्नो सपना ध्वस्त भएको भन्दै यसबाट पार पाउन समय लाग्ने बताउनु भएको छ ।
प्रधानमन्त्रीको सरकारी निवास वालुवाटारमा आज नेपाल प्रज्ञा– प्रतिष्ठानको वार्षिक प्रतिवेदन बुझ्दै उहाले यस्तो बताउनु भएको हो ।
उहाले प्रतिष्ठानले नेपाली समाजलाई रुपान्तरण गरी विचार प्रवाह गर्न महत्वपूर्ण भूमिका खेल्नुपर्छ, यसप्रति सम्पूर्ण देशवासीको अपेक्षा छ भन्नुभयो ।
उहाले प्रतिष्ठानको भौतिक पूर्वाधार विकास, क्षमता अभिवृद्धि र जनतासँगको सम्बन्धलाई प्रभावकारी बनाउँदै बौद्धिक विचारलाई समाज रुपान्तरणमा परिणत गर्न सके मात्र यसको सान्दर्भिकता हुने उल्लेख गर्नुभयो ।
प्रतिष्ठानका कुलपति गङ्गाप्रसाद उप्रेतीले भौतिक पूर्वाधार, बजेट तथा जनशक्तिको अभावले प्रतिष्ठानको भूमिकालाई अझ प्रभावकारी बनाउन नसकिएको बताउँदै यसलाई आत्मनिर्भर बनाउन प्रतिष्ठानका विभिन्न ठाउँका जग्गालाई भाडामा दिएर आम्दानी गर्ने व्यावसायिक योजना तथा ऐतिहासिक सङ्ग्रहालय र पुस्तकालय बनाउने लक्ष्य प्रधानमन्त्रीसमक्ष राख्नुभएको थियो ।
