काठमाडौ २७ मंसिर ।
नेपालका ज्येष्ठ कम्युनिष्ट नेता खगुलाल गुरुङलाई आज नेपालका सबै वामपन्थी पार्टीले सामूहिक रुपमा अभिनन्दन गर्ने भएको छ ।
विसं २००७ सालको राणाविरोधी आन्दोलनका स्वतन्त्रता सेनानी ९८ वर्षीय नेता गुरुङलाई राजधानीमा आज एक कार्यक्रमकाबीच सार्वजनिक अभिनन्दन गर्न लागेका हुन् । अस्वस्थ रहनु भएका नेता गुरुङ अहिले उपचारका लागि काठमाडौंमा हुनुहुन्छ ।
नेता गुरुङलाई प्रधानमन्त्री तथा नेकपा एमालेका अध्यक्ष केपी शर्मा ओली, एकीकृत नेकपा माओावादीका अध्यक्ष पुष्पकमल दाहाल प्रचण्ड, नेकपा–माआवादीका अध्यक्ष मोहन वैद्य किरण सहित सबै वामपन्थी पार्टीका प्रमुख नेताले सामूहिक अभिनन्दन गर्ने कार्यक्रम रहेको बताइएको छ ।
नेपाल कम्युनिष्ट पार्टी प्युठानका संस्थापक सदस्य गुरुङ २०१५ सालको आम निर्वाचनमा ८३ नम्बर निर्वाचन क्षेत्रबाट नेपाल कम्युनिष्ट पार्टीको तर्फबाट उम्मेदवार बन्नु भएको थियो ।
उहाँको अभिनन्दनका लागि सबै वामपन्थी दलको सहभागितामा नेकपा मसालका महामन्त्री मोहनविक्रम सिंहको संयोजकत्वमा अभिनन्दन समारोह समिति बनाइएको छ ।
नेता गुरुङलाई काठमाडौंको भृकुटिमण्डपमा रहेको पर्यटन बोर्डको सभाहलमा आज दिउँसो विशेष कार्यक्रम गरी अभिनन्दन गरिने समितिले जनाएको छ ।
