काठमाण्डौ,२६ मंसिर ।
सूचना तथा सञ्चार प्रविधिमन्त्री शेरधन राईले मधेस समस्याको निकासका लागि सरकारले तत्कालै निर्णायक वार्ता गर्ने बताउनुभएको छ ।
भक्तपुरको आज आयोजित कार्यकक्रममा उहाँले नाकाबन्दी गर्ने, मानवीय सङ्कट पैदा गर्ने, अवरोध पैदा गर्ने कामले समस्याको निकास ननिस्कने बताउँदै उहाँले समस्याको निकासका लागि वार्ता र संवाद एक मात्र विकल्प रहेको बताउनु भयो ।
राईले नेपालको समस्या लिई बाहिर गएर हारगुहार गर्दैमा र अरुको शरणमा पर्दैमा समाधान नहुने बताउँदै आफ्नो देशको समस्याको समाधान पनि यहीँबाट निकाल्नुपर्नेमा जोड दिनुभयो ।
भूकम्पबाट भन्दा बढी नाकाबन्दीबाट देशलाई नोक्सान भएकाले अब चाँडै स्पष्ट नीतिका साथ निष्कर्षमा पुगेर समस्याको समाधान गर्नुपर्नेमा उहाँले जोड दिनुभयो । सरकारले अगाडि सारेको दुईवर्षीय सुधारको कार्ययोजनालाई सफल बनाएर जनतालाई अनुभूति हुने गरी परिवर्तन गरिने उहाँको भनाइ छ ।
