काठमाडौ २४ मंसिर ।
नेकपा एमालेका महासचिव ईश्वर पोख्रेलले मुलुकमा जारी संकट समाधानका लागि तराई, पहाड, हिमालका नेपाली बीचको एकता हुनु जरुरी भएको बताउनु भएको छ ।
प्रेस चौतारी नेपालले आज डडेल्धुरामा आयोजना गरेको पत्रकार सम्मेलनमा बोल्दै महासचिव पोखरेलले मुलुक असहजतामा गुज्रिरहेको अवस्थामा जातजाति, दलहरू, तथा आम नेपाली बीचको एकता हुनु जरुरी भएको बताउनुभयो ।
भारतको चाहनाअनुसार संविधान जारी नभएका कारणले उसले नाकाबन्दी गरेर दुःख दिएको आरोप लगाउँदै उहाँले हामीले आफ्नो स्वाभिमानका लागि संविधान जारी गर्दा अरूले टाउको दुखाउनुपर्ने र दुःख दिनुपर्ने कुनै कारण नभएको धारणा राख्नुभयो ।
राष्ट्रिय एकता हुन जरुरी रहेको बताउँदै महासचिवले हामी बीचको एकता, राष्ट्रियता स्वाभिमान र सर्वपक्षीय समीकरण गरेर सबैले एकजुट भएर आगाडि जानुपर्नेमा जोड दिनुभयो । नाकामा सहजता ल्याउन छिमेकीसँगको सम्बन्ध सन्तुलित हुनुपर्ने महासचिव पोख्रेलले बताउनुभयो ।
