काठमाडौ २३ मंसिर ।
एकिकृत नेकपा माओवादीको केन्द्रिय कार्यसमितिको बैठक आज पनि बस्दैछ । पार्टी केन्द्रिय कार्यलय पेरिसडाँडामा बिहान ११ बजेपछि बस्ने बैठकमा आजपनि अध्यक्ष पुष्पकमल दाहालको राजनितिक प्रतिवेदनमाथि केन्द्रिय सदस्यहरुले धारणा राख्ने जारी रहने बताइएको छ ।
प्रतिवेदनमाथि बोल्न ९० जना भन्दा बढीले नाम टिपाएकाले बैठक अझै केही दिन लम्बिने पार्टी प्रवत्ता दिनानाथ शर्माले जानकारी दिनुभयो ।
यसअघि बोल्ने केन्द्रिय सदस्यहरुले पार्टीले जनभावना र जनचाहनालाई भुल्ने काम गरेको भन्दै जनतातर्फ फर्क र जनताको भावनालाई सुन भन्ने एजेन्डाका आधारमा अगाडि बढ्न आग्रह गरेका छन् ।
पार्टीको आधार भुल्ने, जनताको एजेन्डाबाट कट्ने, सुख–दुःखमा साथ नदिने प्रवृत्तिले पार्टी, क्रान्ति र नेतृत्वको समेत हित नगर्ने भएकाले तत्काल पार्टी्भित्र सुधारको आवश्यकता भएको नेताहरुले धारणा राखेका थिए ।
यस्तै, राष्ट्रियता र सार्वभौमसत्ताको पक्षमा अडान राखेकै आधारमा पार्टीलाई नै सिध्याउने ढंगले महासचिव कृष्णबहादुर महरामाथि अख्तियार दुरुपयोग अनुसन्धान आयोगले पत्र काटेकोमा आपत्ति प्रकट गरिएको थियो ।
