काठमाडौँ, २१ मङ्सिर ।
परम्परागत ढङ्गले पार्टी सञ्चालन गर्ने पद्धतिलाई तत्काल सुधार गर्न एकीकृत नेकपा(माओवादी)का केन्द्रीय सदस्यले पार्टीको शीर्ष नेतृत्वलाई सुझाव दिएका छन् ।
एमाओवादीको जारी केन्द्रीय समितिको बैठकमा अध्यक्ष पुष्पकमल दाहालले प्रस्तुत गर्नुभएको प्रतिवेदनमाथि धारणा राख्ने सदस्यहरुले बदलिँदो परिवेशलाई आत्मसात् गर्दै पार्टीलाई अगाडि बढाउनुपर्नेमा जोड दिएका हुन् ।
बैठकमा धारणा राख्ने अधिकांश केन्द्रीय सदस्यहरुले विगतकै पद्धति र प्रणालीका आधारमा पार्टी चलाउने र फरक मतलाई सम्मान गर्न नसकिए गलत संस्कार हुर्कने भएकाले त्यसलाई बेलैमा सच्याउन आग्रह गरे ।
राष्ट्रिय अखण्डता, सार्वभौमसत्ता सङ्कटमा परेका बेला पार्टीले स्पष्ट नीति तथा योजना अगाडि सार्नुपर्ने, संविधानसभाले पारित गरेको संविधानको सहज कार्यान्वयन गर्दै आन्तरिक राष्ट्रियताको सुदृढीकरण गर्नुपर्ने उनिहरुको धारणा थियो ।
माओवादी मान्ने सबै घटक र पार्टीबीच एकता प्रक्रिया सुरु गर्न, विगतमा विभिन्न कारणले छुट्टाछुट्टै रुपमा रहेकालाई समेट्न स्पष्ट खाका र कार्ययोजना ल्याउनुपर्नेमा समेत जोड दिएका थिए ।
आजको बैठकमा विश्वभक्त दुलाल, नारायण दाहाल, देवी खड्का, नारायण शर्मा, नन्दकुमार प्रसाईं, शालिकराम जमरकट्टेल, पुष्पा घर्ती, लक्की शेर्पा, पवन शर्मा र ज्वाला साहले अध्यक्ष दाहालको प्रतिवेदनमाथि आआफ्नो धारणा राखेका थिए ।
