काठमाडौँ, १ असोज । मुलुकको औद्योगिक, आर्थिक र सामाजिक विकासका लागि सरकारले विज्ञान प्रविधिको क्षेत्रमा लगानी बढाउनुपर्नेमा जोड दिइएको छ ।
तेस्रो राष्ट्रिय विज्ञान दिवस–२०७२ का अवसरमा विज्ञान, प्रविधि तथा वातावरण मन्त्रालयद्वारा यहाँ आज आयोजित कार्यक्रममा विज्ञानको विकासले नै उपयुक्त प्रविधिको विकास र विस्तारलाई सहयोग पु¥याउने हुँदा सो क्षेत्रमा सक्दो लगानी बढाउनुपर्नेमा वक्ताले जोड दिनुभएको हो । ‘राष्ट्र निर्माणका लागि विज्ञान र प्रविधि’ भन्ने मूल नाराका साथ आज मुलुकभरि विज्ञान दिवस मनाइएको छ ।
सो अवसरमा राष्ट्रिय योजना आयोगका उपाध्यक्ष प्रा डा गोविन्दराज पोखरेलले विज्ञानको अनुसन्धानमा लगानी बढाउन आफूले सक्दो पहल गर्ने प्रतिबद्धता व्यक्त गर्नुभयो । आयोगका सदस्य भारतेन्द मिश्रले सरकारले विज्ञान र प्रविधिको महत्व बुझ्नुपर्ने बताउनुभयो ।
त्रिवि विज्ञान सङ्काय प्रमुख चिरिकशोभा ताम्राकारले विज्ञान र प्रविधिमा लगानी कमजोर भएका कारण विद्यार्थीलाई गुणस्तरीय शिक्षा दिन कठिन भएको गुनासो गर्नुभयो । अमृत क्याम्पसका प्रमुख राजेश महाजुले योजना आयोगलाई बजेट बनाउँदा विज्ञानको क्षेत्रलाई प्राथमिकतामा राख्न आग्रह गर्नुभयो । सोही क्याम्पसका विद्यार्थीद्वय उपेन्द्र शाह र राजन अर्यालले पूर्व तयारीबिना नै सरकारले चारवर्षे स्नातक तह लागू गरेकामा गुनासो गर्दै अध्ययनका लागि पुस्तकको समेत समस्या भएको बताउनुभयो ।
दिवसका अवसरमा विज्ञान र प्रविधिसँग सम्बन्धित प्रदर्शनीको आयोजनासमेत गरिएको छ । विज्ञान मन्त्रालय र अमृत क्याम्पसले संयुक्त रूपमा क्याम्पसको प्राङ्गणमा आयोजना गरेको प्रदर्शनीमा ६० कक्ष राखिएको छ । कार्यक्रममा पाँच विकास क्षेत्रका विज्ञान विषयमा उत्कृष्ट अङ्क प्राप्त गर्ने विद्यार्थीलाई सम्मान गरिएको थियो ।
