विदेशमा गरिने पौरख नेपालमा गरे यही पनि मनग्य आम्दानी लिन सकिन्छ भनेर उहाँले आफ्नै घरमा थुक्पा उद्योग सञ्चालनमा ल्याउनुभएको छ । भारतीय सेनाको जागिरबाट २०६२ सालमा अवकास पाएपछि २०६३ सालमा उहाँ इराक पुग्नुभयो ।

इराकमा गरेको दुःख सम्झिएर अहिले उहाँले आफैँ घरमा लघु उद्योगअन्तर्गत थुक्पा उद्योग सञ्चालन गर्नुभएको छ । दुई वर्षअघि रु तीन लाखबाट सुरु गर्नुभएको उहाँको थुक्पा उद्योगमा अहिले छ जानले दैनिक रोजगार पाइरहनु भएको छ ।

“मैले यही उद्योगबाट अहिले मासिक झन्डै रु एक लाख ५० हजारसम्म बचत गर्ने गरेको छु” उहाँले भन्नुभयो । रोजगारीको खोजीमा दैनिक धेरै नेपाली विदेसिने गरेकोप्रति चिन्ता व्यक्त गर्दै उहाँले श्रम र सीप बिना विदेश जानु भनेको ब्रेक फेल भएको सवारी चलाएसरह हुने भन्दै काम सिकेर यही केही व्यवसाय गरे विदेशमा भन्दा राम्रो कमाइ हुने बताउनुभयो ।

उहाँले आफ्नै उद्योगको उदाहरण दिँदै भन्नुभयो– “मलाई पनि यो उद्योगमा थप काम गर्ने मान्छे चाहिएको छ, यहाँका युवा पिठो मुस्न चाहँदैनन् यिनै युवा विदेशमा पुगेर शौचालय सफा गर्छन् त्यहाँ दिने पैसा म यही दिन्छुभन्दा पनि काम गर्ने मान्छे पाइँदैनन् ।”

आफ्नो उद्योगबाट अहिले दैनिक तीन क्विन्टलभन्दा बढी थुक्पा उत्पादन गर्ने गरेको उहाँको भनाइ छ । “सुरुमा त उद्योग नचल्लाकी भनेर चिन्ता थियो तर अहिले मागअनुसारको उत्पादन पु¥याउन मुस्किल छ” उहाँले भन्नुभयो ।

झापासहित पूर्वी पहाडी जिल्ला इलाम, पाँचथर र ताप्लेजुङ आफूले उत्पादन गरेको थुक्पाको मुख्य बजार रहेको बताउँँदै सुब्बाले भन्नुभयो– “थुक्पा उत्पादन खर्च र मजदुरलाई पारिश्रमिक कटाएर दैनिक रु पाँच हजारको हाराहारीमा आफूलाई नाफा हुन्छ ।” इराकमा गरेको दुःख सम्झेर उद्योग खोलेको उहाँको भनाइ छ ।