खोटाङ, २३ भदौ ।
जिल्लाका एक कृषकले किबीको बिरुवा बिक्री गरेर मनग्य आम्दानी गर्नुभएको छ ।
विगत तीन वर्षदेखि किबीको व्यावसायिक नर्सरी सुरु गर्नुभएका दोर्पा चिउरीडाँडा–८ का शुभचन्द्र राईले यस वर्षमात्रै रु साढे पाँच लाख आम्दानी गर्नुभएको हो ।
विभिन्न प्रजातिका किबीको नर्सरी राख्नुभएका राईले प्रति बिरुवा रु ६०० मा बिक्री गर्नुभएको छ । गोल्डेन, हेवार्ड र रेड प्रजातिका गरी यस वर्ष छ हजार ७०० वटा बिरुवा बिक्री गरेको उहाँले बताउनुभयो ।
राईका अनुसार हेवार्ड प्रजातिको किबीको बिरुवा प्रतिवटा रु ३५०, रेड रु ५०० र गोल्डेन रु ६०० मा बिक्री हुने गरेको छ । उत्पादन गरेका बिरुवा नर्सरीबाटै बिक्री हुने गरेका छन् ।
पछिल्लो समय जिल्लाका कृषक किबी खेतीप्रति आकर्षित बनेपछि आगामी वर्ष बाह्र हजार बिरुवा उत्पादन गर्ने तयारी गरेको राईले बताउनुभयो । नर्सरीमा उत्पादित किबीको बिरुवा जिल्लाभित्रका सबै गाविस तथा छिमेकी जिल्ला भोजपुरमा समेत निर्यात हुने गरेको छ ।
शुभ कृषि फार्म दर्ता गरेर व्यावसायिक नर्सरी थाल्नुभएका राईले स्थानीय तीन जना युवालाई रोजगारीसमेत दिनुभएको छ । व्यावसायिक नर्सरी थाल्नुभएका उहाँले सदरमुकाम दिक्तेल नजिकपर्ने नेर्पाको तालखर्कस्थित २० रोपनी जग्गामा किबी खेती पनि गर्नुभएको छ ।
थोरै लगानीले धेरै आम्दानी गर्न सकिने भएकाले किबी खेती सुरु गरेको राईले बताउनुभयो । “तीन वर्ष पहिले रोपेको बिरुवाले यस वर्षबाट फल दिन थालेको छ”, उहाँले भन्नुभयो, “सुरुबाटै राम्रो फल दिएकाले आगामी दिनमा अझै बढाउने तयारी गरेको छु ।”
कानुनमा बिएल तथा समाजशास्त्र र राजनीतिकशास्त्रमा स्नातकोत्तर गर्नुभएका राईले विभिन्न पेसा छाडेर कृषि पेसा अपनाउनुभएको हो । ४५ वर्षीय राईले लामो समयसम्म विभिन्न क्याम्पसमा अध्यापन तथा वकालतको काम गर्नुभएको थियो ।
फार्ममा किबीसँगै पाउलोनिया, सिताके च्याउ, कुरिलो, स्याउ, नास्पातीका साथै विभिन्न प्रजातिका माछासमेत लगाइएको छ । रासस
