काठमाडौं,७ भदौ ।
अखण्ड रुकुमको विषयलाई लिएर रुकुमेली जनता बिभाजित भएका छन् ।
सदरमुकाम मुसीकोटका जनता अखण्ड रुकुमलाई ५ नम्बर प्रदेशमा राख्नुपर्ने पक्षमा छन् । तर, प्रमुख व्यापारिक केन्द्र चौरजहारीका केही जनता भने अखण्ड रुकुमलाई ६ नम्बर प्रदेशमा राख्नुपर्ने पक्षमा छन् ।
प्रदेशको सीमांकन गर्दा रुकुमलाई टुक्राइएको विरोधमा १६ औं दिनदेखि आन्दोलनरत रुकुमेलीहरुले सदरमुकामलाई नाकाबन्दी गरेका छन् । गाउँलेहरुले तरकारी र दूध सदरमुकाममा पठाउन बन्द गरेका छन् ।
रुकुमको पश्चिमी भागलाई ६ नम्बर प्रदेशमा र पूर्वी भागलाई ५ नम्बर प्रदेशमा राखिएपछि रुकुमेली जनताले आन्दोलन चर्काउँदै लगेका छन् ।
एकीकृत रुकुम संघर्ष समिति गठन गरी आन्दोलनरत रुकुमबासिले सिंगो रुकुमलाई ५ नम्बर प्रदेशमा राख्न माग गरेका छन् । आन्दोलन चर्काउँदै लगेपछि स्थानीय प्रशासनले हिजोदेखि जारी गरेको निषेधाज्ञा आज पनि कायमै छ ।
