काठमाण्डौ,६ भदौ ।
सभामुख सुवास नेम्वाङले सांसदहरूलाई संयमित भएर आफ्ना अभिव्यक्ति सदन समक्ष प्रस्तुत गर्न आग्रह गर्नुभएको छ ।
व्यवस्थापिका संसदको आजको बैठकमा सुरुमै समय लिएर बोल्ने केही सांसदले उत्तेजित हुँदै अमर्यादित ढंगले विभिन्न दलका नेता तथा सांसदविरुद्ध नाम नै किटेर आक्षेप लगाएपछि सभामुख नेम्वाङले संयमित भएर आफ्ना अभिव्यक्ति राख्न सभासदलाई आग्रह गर्नुभयो ।
थरुहट तराई पार्टी नेपालका गंगा चौधरीले नेपाली काँग्रेसका नेता शेरबहादुर देउवा र नेकपा (एमाले)का सांसद भीम रावलविरुद्ध आक्रोश पोखेपछि सभामुखले भन्नुभयो ‘उत्तेजित हुनु हुँदैन, असंयमित हुँदा राम्रो सन्देश जाँदैन, सडकमा जारी असंयमता मत्थर पार्ने हामीले असन्तुलित मन्तव्य दिँदा हामी आफैले बनाएको संसदीय नियमावली विपरीत हुन्छ ।’
साथै सभामुखले नेताद्वय देउवा र रावलको नाम व्यवस्थापिका संसद्को ‘रेकर्ड’बाट मेटाउन संविधानसभा व्यवस्थापिका संसद् सचिवालयलाई निर्देशन दिनुभएको छ ।
