पानीको बहाव बढेसँगै नदी आसपास बसोबास गर्ने स्थानीयहरु समस्यामा परेका छन् । देशको पहाडी जिल्लामा ५ दिनदेखि लगातार बर्षा भएईरहेको छ ।
यसैक्रममा ,सुनसरीस्थित सप्तकोशी नदीमा पानीको बहाव बढेर यस बर्षकै उच्च पुगेको छ । अहिले २५ वटा मात्र ढोका खोलिएको छ ।
नदीमा पानी बढेपछि ब्यारेजमा खतराको संकेत रातो बत्ती बाली एकतर्फी सवारी चलाइएको छ । प्रतिसेकेण्ड १ लाख ५० हजार क्युसेक पानी नाघेपछि खतरा मानिन्छ ।
कोशी व्यारेजमा आज बिहान सात बजेको मापनमा भने बहाव १ लाख ९१ हजार ४ सय ८० मा छ । शुक्रबार राती १० बजे गरिएको मापनमा नदीमा पानीको बहाव प्रतिसेकेण्ड २ लाख ८ सय ९८ क्यूसेक पुगेको थियो ।
गए राती ब्यारेजका ५६ मध्ये २७ वटा ढोका खोलिएकोमा थिए । लगातार वर्षा भएकाले ६ दिन यता नदीमा पानीको बहाव बढ्ने क्रम नरोकिएको हो ।
सुनसरीको लौकही, महेन्द्रनगर, चतरा र भण्टाबारी सप्तकोशीको सबैभन्दा जोखिमपूर्ण र प्रभावित क्षेत्र मानिन्छ ।
प्रशासनले ६ दिन यता यस क्षेत्रमा सशस्त्र र नेपाल प्रहरीको उद्धार टोली तयारी अवस्थामा राखेको छ भने स्थानीयलाई सचेत गराइएको छ ।
