काठमाण्डौ,३२ साउन ।
अखण्ड सुदूरपश्चिम र थरूहटका युवाहरूबीच सोमबार धनगढीमा झडप भएको छ । आज साझ धनगढीको हसनपुर चौकमा दुबै पक्षका युवाहरूबीच झडप भएको छ ।
राष्ट्र बैंक चौक हुँदै प्रदर्शनमा उत्रिएका अखण्ड सुदूरपश्चिमका युवाहरू र ट्याक्टरमा आएका थरूहटका युवाहरूबीच हसनपुर चौकमा झडप भएपनि प्रहरीले अश्रृग्यास प्रहार गरी स्थितिलाई नियन्त्रणमा लिएको छ ।
दुबै पक्षबीच ढुंगा हानहान भएपनि सुरक्षार्थ खटिएका नेपाल प्रहरी र सशस्त्र प्रहरीले स्थितिलाई नियन्त्रणमा लिएका थिए । दुवै पक्षबीच भीडन्त हुन नदिन स्थानीय प्रशासनले धनगढीको मुख्य सडकको तीन ठाउँमा काँडेतार बाटो बन्द गरको थियो ।
उनीहरूले ट्राफिक चौक, एलएनचौक, राष्ट्र बैंक चौकमा प्रदर्शन गर्नुका साथै टायर बालेर बिरोध प्रदर्शन गरेका थिए ।थरूहटको सभामा सहभागी हुन आएका नेता र स्थानीयहरूलाई प्रहरीले बैकल्पीक बाटो भएर सभा स्थल जाने व्यवस्था गरेको थियो ।
कैलालीमा थरूहटले साउन २३ गतेदेखि आमहडताल घोषणा गरेको छ, भने अखण्ड सुदूरपश्चिमले फेरि सोमबारदेखि आमहडताल घोषणा गरेको छ । दुबै पक्षको प्रदर्शनले आज दिनभर धनगढी तनाबग्रस्त रह्यो ।
