काठमाडौं, ३१ साउन ।
मोहन वैद्य नेतृत्वको नेकपा–माओवादी, जनजाति र मधेस केन्द्रित दलले आह्वान गरेको बन्दका कारण बिहानै देखि जनजीवन प्रभावित भएको छ ।
बन्दकर्ताहरु बिहानैदेखि सडक तथा चोकहरुमा जम्मा भएर प्रदर्शन गरिरहेका छन् । बन्द गराउदै हिडेका १ सय २५ जना बन्दकर्तालाई प्रहरीले बिहानै राजधानीका बिभिन्न सडकबाट पक्राउ गरेको फोरम नेपालका नेता आङकाजी शेर्पाले जानकारी दिनुभयो ।
चावहिल , भोटाहिटी ,नयाँ बानेश्वर र कोटेश्वरबाट उनीहरुलाई पक्राउ गरेको उहाले बताउनु भयो ।
बन्दका क्रममा काठमाडौंको बबलमहलमा बिहानै बा २ ख ९६६१ नम्बरको बसमा तोडफोड भएको छ ।
बन्दका बेलामा गाडी चलाएको भन्दै बन्दकर्ताले अरनिको राजमार्गमा गुड्ने सो बसमा तोडफोड गरेका हुन् ।
राजधानी उपत्यका सहितका काठमाडौं भित्रिने र बाहिरिने गाडी फाट्टफुट्ट मात्रै चलेका ट्राफिक प्रहरीले जनाएको छ ।
बन्दमा हुने सक्ने अराजक गतिविधि रोक्न सरकारले सुरक्षा व्यवस्था कडा पारेको छ । बिहानैदेखि चोकचोकमा प्रहरी परिचालन गरिएको छ ।
प्रतिगामी संविधान ल्याउन खोजेको भन्दै नेकपा –माओवादि , संघिय समाजवादी फोरम नेपाल ,सामाजिक लोकतान्त्रिक फोरम ,संघिय लिम्बुवान पार्टी , संघिय जनतान्त्रिीक मंच र विजय गच्छादार बाहेकका मधेश सम्बद्ध दलले संविधानको मस्यौदा खारेज गर्नुपर्ने मागसहित आज बन्द गरेको हो ।
