काठमाडौं, ३० साउन ।
पूर्वपश्चिम राजमार्ग अन्तर्गत नवलपरासीको बासामा प्रदर्शनकारी र प्रहरीबीच झडप हुँदा तीन जना प्रहरी सहित सात जना घाइते भएका छन् । बन्द रहेका गाडी खुलाउने क्रममा बन्दकर्ता र प्रहरीबीच झडप हुँदा प्रहरी र प्रर्दशनकारी घाइते भएका हुन् ।
बन्दकर्ताले नवलपरासी क्षेत्र नम्बर ४ का एमाले सभासद बैजनाथ चौधरीको घरमा आक्रमण गर्न खोजेपछि हवाइफायर पनि गरेको प्रमुख जिल्ला अधिकारी हरिप्रसाद मैनालीले जानकारी दिनुभयो । बन्दकर्ताले भने प्रहरी गोली चलाएको आरोप लगाएका छन् ।
प्रहरीले भीडलाई तिररवितर पार्न केही सेल अश्रुग्यास समेत प्रहार गरेको छ । घाइतेहरुको स्थानीय अस्पतालमा उपचार भैरहेको छ ।
यस्तै नवलपरासीको बासाबसाही र तुलसीनगर क्षेत्र पनि तनावग्रस्त बनेको छ । पूर्वपश्चिम राजमार्ग्स्थित बासामा सडक अवरुद्ध गरेका आन्दोलनकारीमाथि प्रहरीले ११ सेल अश्रुग्यास प्रहार गरेको छ ।
आन्दोलनकारीले हिजो साँझ एमाले परासीस्थित पार्टी कार्यालय तोडफोड गरेका थिए । यसैबीच नेकपा एमाले नवलपरासीले विज्ञप्ति जारी गरी घटनाको निन्दा गरेको छ ।
