काठमाडौँ, २६ साउन ।
उपप्रधान तथा स्थानीय विकासमन्त्री प्रकाशमान सिंहले अहिले प्रस्ताव गरिएको प्रदेशको सीमांकन अन्तिम नभएको भन्दै थप छलफलबाट निर्णयमा पुग्न सकिने बताएका छन् ।
मंगलबार राजधानीमा नेपाल स्वतन्त्र युवा संघले गरेको पुरस्कार तथा सम्मान कार्यक्रममा उनले अहिले देखिएका विवादलाई आयोग गठन गरेर मिलाउन सकिने सिंहको भनाई थियो ।
सीमांकनलाईलिएर भइरहेका आन्दोलन अर्कै दिशातर्फ मोडिनसक्ने भन्दै मन्त्री सिंहले सबैलाई सचेत बन्न आग्रह गरे ।
कार्यक्रममा सामान्य प्रशासनमन्त्री लालबाबु पण्डितले देश परिवर्तनका लागि महत्वपूर्ण भूमिका युवा शक्तिले निर्वाह गर्न सक्ने भन्दै त्यसका लागि अघि बढ्न युवाहरुलाई आग्रह समेत गरेका छन् ।
‘हरेक नेपालीले मुखमा मात्रै होइन, मन र व्यवहारमा नै राष्ट्रप्रति प्रेमभाव देखाउन सके मात्रै देश विकास हुने’ उनको भनाइ थियो ।
कार्यक्रममा मन्त्री श्रेष्ठ र पण्डितले इमेजकर्मी कोमल शेरचनसहित विभिन्न मिडियामा कार्यरत सन्चारकर्मीहरुलाई युवा पत्रकार प्रतिभा पुरस्कार प्रदान गरेका थिए ।
यस्तै, कान्तिपुर दैनिकका समाचार सम्पादक हरिबहादुर थापाले उत्कृष्ट युवा पत्रकार सम्मान र युवा प्रतिभा पुरस्कार गायक तिलकबम मल्लले हात परेका थिए ।
