काठमाडौ २६ साउन
प्रदेश सिमांकनको क्रममा कर्णाली अञ्चललाई सुदूर पश्चिममा गाभिएको भन्दै आज कर्णाली अन्चलका पाँच वटै जिल्ला बन्द आह्वान गरिएको छ ।
यसअघि हिजो जुम्ला मात्र बन्द गरिएकोमा आज एकीकृत नेकपा माओवादीको अगुवाइमा हुम्ला, मुगु, कालिकोट र डोल्पा पनि बन्दको आह्वान गरिएको हो ।
बन्दका कारण त्यस क्षेत्रमा लामो तथा छोटो दुरीका सवारी साधन सन्चालनमा आउन सकेका छैनन् भने पसल, बजार तथा शैक्षिक संस्था ठप्प रहेका छन् ।
कर्णाली प्रदेशलाई स्वायत्त क्षेत्र घोषणा गर्नुपर्ने माग गर्दै पांचवटै जिल्लाका स्थानीय राजनीतिक दलहरु, नागरिक समाज तथा सर्वसाधारण आन्दोलनमा उत्रिएका हुन् ।
प्रदर्शनकारीले जुम्ला विमानस्थल समेत बन्द गराएका छन् । संभावित झडपलाई मध्यनजर गर्दै ती जिल्लाहरुमा सुरक्षा व्यवस्था कडा पारिएको स्थानीय प्रशासनले जनाएको छ ।
यता, प्रदेश विभाजनका क्रममा रुकुम जिल्ला पनि विभाजन गरिएको भन्दै आज दोस्रो दिन पनि रुकुम जिल्ला बन्दको आह्वान गरिएको छ ।
नागरिक समाज रुकुमले शुरु गरेको आन्दोलनमा उद्योग वाणिज्य संघ र जिल्लाका सबै राजनीतिक दलहरुले समर्थन जनाएका छन् ।
