काठमाण्डौ, २५ साउन ।
ब्यबस्थापिका संसदको बिकास समितीले त्रिभुवन अन्तराष्ट्रिय विमानस्थल वरपरका अग्ला भौतिक संरचनाहरु तीन महिना भित्र हटाउन निर्देशन दिएको छ ।
समितिले विमानस्थल नजिकको ८ तले घर र अन्य संरचनाहरु हटाउन सरकार, पर्यटन मन्त्रालय, गृह मन्त्रालय, स्थानीय विकास मन्त्रालय, काठमाडौं उपत्यका विकास प्राधिकरण, नगर विकास प्राधिकरण र काठमाडौं महानगरपालिकालाई निर्देशन दिएको हो ।
समितीले पर्यटन मन्त्रालयका सचिव तथा सम्बद्ध पदाधिकारीहरुसँग छलफल पछि आज बसेको बैठकले भौतिक संरचनाहरु हटाउने सम्बन्धमा हालसम्म भएको कार्य प्रगति समितिमा उपलब्ध गराउन र यस्ता अवरोधहरु ३ महिनाभित्र समाधान गरिसक्न निर्देशन दिएको सभापति रबिन्द्र अधिकारीले जानकारी दिनुभयो ।
बैठकले पर्यटन मन्त्रालयलाई विमानस्थलको स्तरोन्नति गर्ने कार्यलाई पहिलो प्राथमिकतामा राख्न र स्थानीयस्तरमा देखिएका समस्या समाधान गर्ने तर्फ समन्वयकारी भूमिका निर्वाह गरिदिन गृह मन्त्रालय र स्थानीय विकास मन्त्रालयलाई निर्देशन पनि दिएको छ ।
