काठमाडौं २४ साउन ।
आज विश्व आदिवासी दिवस । नेपालमा पनि विविध कार्यक्रम गरी मनाइदैछ ।
संयुक्त राष्ट्रसंघको अह्वानमा हरेक वर्ष अगस्ट ९ तारिखमा यो दिवस मनाउने गरिन्छ । विश्वभरी छरीएर रहेका आदिवासीहरुलाई एकत्रित बनाउन तथा उनीहरुको आवाजलाई बलियो बनाउने उद्धेश्यले यो दिवस मनाउन थालिएको हो ।
राष्ट्रसंघले आदिवासीहरुको स्वास्थ्य र सम्मुन्नतिको सुनिश्चितालाई यस वर्षको नारा तय गरेको छ ।दिवसका अवसरमा नेपाल आदिवासी जनजाति महासंघ लगायतका आदिवासी जनजाति संघसंगठनले विभिन्न कार्यक्रमको आयोजना गरेको छ ।
पहिचान सहितको संघियता आदिवासी जनजातिको अडान, धर्म निरपेक्षता समानुपातिक समावेशी सहितको नयाँ संविधान भन्ने मुल नाराका साथ महासंघले यस वर्षको दिवसमा सडकमै मनाउने भएका छन् ।
आफूहरुसँग विगतमा भएको सहमतिहरुलाई संविधानको मस्यौदामा नसमेटेको भन्दै विरोध स्वरुप यस पटकको दिवस सडकमै मनाउने तयारी भएको महासंघले जनाएको छ ।
मध्यान्न १२ बजे राजधानीको भृकुटी मण्डपबाट सुरु हुने संस्कृतिक झाँकी सहितको र्याली नयाँ बानेश्वरमा पुगेर सभामा परिणत हुने जनजाति महासंघका अध्यक्ष नगेन्द्र कुमालले जानकारी दिनुभयो । र्यालीमा विभिन्न जातीय संघ संघ संगठनको सहभागीता रहनेछ ।
