बाजुरा , १७ साउन ।
नेकपा माओवादी नेता तथा पूर्वसभासद डबल शाहलाई प्रहरीले विनाकारण पक्राउ गरेको भन्दै माओवादीले कडा आपत्ति जनाएको छ ।
शाहलाई प्रहरीले गयराति बाजुरास्थित उहााको आफ्नै घरबाट पक्रेर जिल्ला प्रहरी कार्यालय बाजुरामा राखेको छ । नेकपा माओवादी सेति उपब्युरो इन्चार्ज रामप्रसाद तिमिल्सनाले नेता शाहलाई तत्काल रिहाई गर्न माग गर्नुभयो ।
माओवादी बाजुराले शुक्रबार बाजुराका स्थानिय विकास अधिकारी युवराज पौडेलले ठुलो रकम भ्रष्टचार गरेको भन्दै कालो मोसो दलेको थियो । नेकपा माओवादी बाजुराले भ्रष्टचारीलाई कालो मासो दल्दा यसरी प्रशासनले हस्तक्षेप गरेको प्रति कडा आपत्ति जनाउदै यदि तत्काल रिहाई नगरे कडा संघर्षको कार्यक्रम घोषणा गर्ने बताएको छ ।
यसैविच नेत्रविक्रम चन्द विप्लव नेतृत्वको नेकपा माओवादीका कार्यकर्ताले आइतबार दिउासो उदयपुरको रामपुरठोक्सिला गाबिसका एक एम्बुलेन्स सञ्चालकलाई कालोमोसो दलेका छन् ।
सप्तेश्वरी सेवा समिति रामपुरठोक्सिला–७ द्वारा सञ्चालित एम्बुलेन्सको खरिद तथा सञ्चालनमा अनियमितता गरेको भन्दै माओवादी कार्यकर्ताले समितिका पूर्वअध्यक्ष रामपुरठोक्सिला–७ लालबजारका ५० वर्षका भिमबहादुर खड्कालाई कालोमोसो दलेका हुन् ।
खड्कालाई दिउासो ५ बजेको समयमा लालबजारचौकमा माओवादी जिल्ला सदस्य पूर्णबहादुर तामाङ्गको नेतृत्वमा सात जनाको समूहले कालोमोसो दलको जिल्ला प्रहरी कार्यालयका डिएसपी जयराज सापकोटाले बताउनुभयो ।
