काठमाण्डौ,१५ साउन ।
युनिटी लाइफ इन्टरनेशनलका सञ्चालक सदस्य विष्णु क्षेत्री पक्राउ परेका छन । महानगरीय प्रहरी अपराध महाशाखाले उनीसहित उनका भाई कृष्ण क्षेत्रीलाई नेपाल भारतको सीमा क्षेत्र गड्डा चौकीबाट पक्राउ गरेको हो ।
गैरकानुनी रुपमा बैंकिङ, इन्स्योरेन्सजस्ता आर्थिक गतिविधि सञ्चालन गरी आम सर्वसाधारणको अर्बौं रुपैयाँ ठगी गरेको भन्दै सरकारले करिब ४ वर्षअघि युनिटीका सञ्चालकहरुलाई कारवाही शुरु गरेको थियो। आफूहरुमाथि कारवाही शुरु भएपछि क्षेत्री दाजूभाई फरार थिए ।
प्रहरीले डेढ वर्षअघि युनिटीक अध्यक्ष काशी गुरुङलाई पक्राउ गरे पनि क्षेत्री दाजूभाई भने फेला परेका थिएनन् । भारतमा लुक्दै बसेका कृष्ण क्षेत्रीले एक महिनाअघि फेसबुकमार्फत आफ्ना दाजु विष्णु क्षेत्रीको गोली हानी हत्या भएको भन्दै झुटो दाबीसहितको हल्ला चलाएका थिए । उक्त झुटो दाबीपछि प्रहरीले यी दुई दाजुभाईको खोजी प्रक्रियालाई अझ तीव्र बनाएको थियो ।
