काठमाडौं, १५ असार ।
कास्की र म्याग्दीका विभिन्न स्थानमा गएको पहिरोमा परी मृत्यु हुनेको संख्या ३५ पुगेको छ ।
जिल्ला प्रहरी कार्यालय कास्कीले मिर्मिरेलाई दिएको जानकारी अनुसार कास्कीको लुम्ले, भदौरे ढिकुरपोखरीमा मात्र पहिरोमा परी मृत्यु हुनेको संख्या ३० पुगेको हो ।
बुधबार राति अविरल बर्षासँगै खसेको पहिरोमा परि लुम्लेमा २३, भदौरे तामागीमा ५ र ढिकुरपोखरीमा २ जना जनाको मृत्यु भएको प्रहरीले जनाएको छ ।
लुम्लेमा पहिरोले १७ घर पुरिदा लुम्ले–६ का अर्जुन गुरुङ, रत्ना पौडेल, बसन्त बिक, चिजा बिक, सम्झना बिक, सविना बिक, सुनिल बिक, मञ्जु सुनार र उनकी ३ महिनाकी छोरीको मृत्यु भएको छ ।
यस्तै सुमकुमारी जिसी, सुगम जिसी, संगम जिसी, छिरिङ राई, नाम नखुलेकी उनकी श्रीमतीका साथै खिमौरी बिक र पद्मा देवकोटाको मृत्यु भएको कास्की प्रहरीले जनाएको छ ।
उता, भदौरेमा ८ घर बगाउँदा टिकाराम बिक, रामकुमारी बिक, नन्दकली पराजुली, गौरी पराजुली र करण पराजुलीको मृत्यु भएको छ । पहिरोमा परी लुम्लेमा ७ जना घाइते भएका छन भने ९भन्दा बढी बेपत्ता भएको जिल्ल प्रहरी कार्यालयले जनाएको छ । पहिरोमा परि भदौरे तामागीमा १३ जना घाइते भएका छन् भने ५ जना बेपत्ता छन् ।
घटनास्थलमा डोजर प्रयोग गरी नेपाली सेना, नेपाल प्रहरी र शसस्त्र प्रहरीले उद्धार कार्य जारी छन् ।घाइतेहरुको पोखराका विभिन्न अस्पतालहरुमा उपचार भइरहेको प्रशरीले जनाएको छ । भदौरे तामागीमा एक हजार मिटरभन्दा माथिबाट आएको पहिरोले भदौरेमा जाने तीनवटा पुलसमेत बगाएको छ ।
अविरल बर्षापछि कास्कीमा रहेको खहरे र हर्पन खोलामा बाढी आएपछि आसपासका स्थानीयहरु सुरक्षीत स्थान खोज्दै डाँडाँतर्फ लाग्दा पहिरो झरेको स्थानीयहरुको भनाई छ ।
