काठमाडौ १३ साउन ।
आगामी साउन मसान्त भित्र संविधान जारी गर्ने तयारीमा जुटेका प्रमुख चार दलका शीर्ष नेताहरुले आज संवैधानिक निकायका प्रमुखहरुसँग संविधानको मस्यौदाका विषयमा परामर्श गरेका छन् ।
प्रधानमन्त्री निवास बालुवाटारमा नेपाली कांग्रेस, नेकपा एमाले, एकीकृत माओवादी र फोरम लोकतान्त्रिकका शीर्ष नेताहरुले प्रधानन्यायाधीश कल्याणकुमार श्रेष्ठसहित संवैधानिक निकायका प्रमुखहरुलाई बोलाएर आगामी संविधानमा समेट्नुपर्ने संवैधानिक निकायका अधिकार लगायतका विषयमा परामर्श गरेका हुन् ।
त्यस क्रममा संवैधानिक निकायका प्रमुखहरुले संविधानको मस्यौदामा धेरै त्रुटि रहेको भन्दै त्यस्ता त्रुटि सच्याउन सुझाव दिएका छन् ।
त्यस क्रममा चार दलका शीर्ष नेताहरुले पनि मस्यौदामा देखिएका त्रुटि थप छलफल गरेर सच्याउने प्रतिबद्धता जनाएको नेपाली कांग्रेसका महामन्त्री कृष्णप्रसाद सिटौलाले जानकारी दिनु भयो ।
