चीनमा एप्पलको नक्कली आइफोन बनाउने कम्पनीमा छापा मारी त्यसमा कार्यरत ९ जनालाई पक्राउ परेका छन ।
सयौं कामदार रहेको उक्त कम्पनीले विभिन्न ब्रान्डाका पुराना स्मार्टफोनका पाटपुर्जा मिलाएर नयाँ आइफोन बनाउने गरेको भेटिएको हो ।
श्रीमान श्रीमती मिलेर चलाएको कम्पनीले अहिलेसम्म एक करोड ९० लाख अमेरिकी डलर भन्दा धेरै मुल्य पर्ने ४१ हजार वटा नक्कली आइफोन बनाएको अधिकारीले बताएका छन् ।
उक्त कम्पनीबारे गत मे १४ मा थाहा पाएको भएपनि बेइजिङका अधिकारीले आइतबार मात्रै यस विषयमा जानकारी दिएका हुन् । चीनको राजधानी बेइजिङबाट उत्तरतर्फको बाहिरी क्षेत्रमा रहेको कम्पनीमाथिको अनुसन्धान गएको जनवरी महिनामा सुरु भएको थियो ।
चीनमा आइफोन मात्रै नभएर अन्य सामग्रीको पनि नक्कली उत्पादन हुने गरेकाले त्यस्ता साम्रगी उत्पादनलाई निरुत्साहित गर्ने गरी संयुक्त रुपमा काम गर्न अमेरिकी अधिकारी र चिनिया अधिकारी सहमत भएका छन् । चीनको कुनमिङ शहरमा चार वर्ष अघि नक्कली एप्पल स्टोर पनि भेटिएको थियो ।
