काठमाडौ १२ साउन ।
गुणस्तर तथा नापतौल विभागले पोखराका पाँच वटा पेट्रोल पम्पलाई कारवाही गरेको छ । पेट्रोल पम्पको छड्के अनुगमनका क्रममा कम पेट्रोल बेचेको पाइएपछि कारवाही गरिएको विभागले जनाएको छ ।
थप दुई वटा पेट्रोल पम्पको विषयमा अझै पनि अनुसन्धान भैरहेको र अन्य ३ वटा पेट्रोल पम्पलाई सामान्य कारवाहीपछि सञ्चालन अनुमति दिइएको गुणस्तर तथा नापतौल कार्यालय पोखराका वरिष्ठ निरीक्षक मनोजकुमार पोखरेलले बताउनुभयो ।
गुणस्तर तथा नापतौल कार्यालय कास्कीका विभागीय वरिष्ठ निरीक्षक राकेशकुमार झा नेतृत्वको टोलीले अनुगमन गर्दा कमजोरी भेटेपछि गण्डकी पेट्रोलियम कम्पनी अमरसिंहचोक र श्रीओम पेट्रोलियम टेडर्स चाउथे विरुद्ध कारवाही प्रक्रिया अघि बढाएको हो ।
१० लिटर पेट्रोल भर्दा २० देखि ४० एमएलसम्म कम भए खासै त्रुटि नमानिने भएपनि दुवै पप्पमा ३ सय एमएलसम्म कम भएपछि अनुसन्धानका लागि बन्द गरिएको हो । दुवै पम्पलाई उपभोक्ता संरक्षण ऐन अनुसार डेढ महिनासम्म बन्द गरेर अनुसन्धान थालिनेछ ।
