काठमाडौ १२ साउन ।
संविधान निर्माणका क्रममा असन्तुष्ट दलहरुसँग प्रमुख चार राजनितिक दलले आजबाट छलफल गर्दैछन् ।
आगमी साउन मासन्त भित्र संविधान जारी गर्ने तयारीमा जुटेको प्रमुख दलले संविधानसभा भित्र र बाहिर रहेका असन्तुष्ट पक्षसँग छलफल गर्न लागेका हुन् ।
संविधानसभा भित्र रहेको राप्रपा नेपाल, केही मधेश केन्द्रित दल तथा संविधानसभा बाहिर रहेको नेकपा माओवादीसँग छलफल गर्ने दलहरुको तयारी छ ।
असन्तुष्ट पक्षसँगको छलफलपछि प्राप्त सुझावलाई आधार बनाई मस्यौदा परिमार्जनको काम थाल्ने दलहरुको तयारी रहेको एकिकृत नेकपा माओवादीका उपाध्यक्ष नारायणकाजी श्रेष्ठले जानकारी दिनुभयो ।
यसअघि हिजो साँझ प्रधानमन्त्री निवास वालुवाटारमा बसेको सत्तारुढ दल नेपाली काँग्रेस, एमाले तथा विपक्षी एकीकृत नेकपा माओवादी र मधेशी जनअधिकार फोरम लोकतान्त्रिकको बैठकले असन्तुष्ट पक्षलाई पनि समेटेर संविधान निर्माण प्रक्रिया अघि बढाउने निर्णय गरेको हो ।
बैठकमा प्रमुख सचेतकहरुले भावी संविधानको मस्यौदामा जनताबाट प्राप्त सुझावलाई समेटी ७ बुँदे प्रतिवेदन प्रस्तुत गरेका थिए ।
